粟米條

誠意推介 : EDO 粟米條 有好多味道架 我覺得最好味係 粟米忌廉湯



點知頭先傻傻地 拎錯左 : 芝士味 好彩都唔錯



仲俾我發現有新味道 : 燒章魚丸味 好好味架喎
世間上好味的東西 都係無益的

開鋪....

無事喇 繼續營業



毒素未清 繼續沉迷

PS : 救命呀!!! 剛剛發現 我個超昂貴嘅漆皮銀包被印左粒字呀
應該係D購物單嘅油墨 有無人識點洗甩佢呀
萬請各高人救救佢 (真心貴架 唔係講笑)

吓....唔係嘛

做咩呀.....



點解會 maintenance 呀!!! 成晚流流長 做咩好呢
唔通真係要睇 '柴九'? 我又無追開架 早知出街玩啦

足三両

之前呢個包 要 21:00 後先有得賣 即係無機會啦
依家 11:00 後就有得食 今日假期 終可一試



其實都明知佢係麻麻地 因為佢個 selling point 係舊'巨肉'
但人呢... 咩都要試下嘛
結果食無一半 已經投降 太膩喇
個餐仲超貴 $31.20

小人國 2

尋晚終於睇左 應該尋晚打嘅後感 一開部電腦 咪又係即刻玩 facebook

霸晒D時間囉 (滿腦子都係我間餐廳 中毒太深啦) 

喺什麼金融海嘯下 場數爆完再爆 証明呢個鬼妹仔 果然有吸引力

今次個劇場係 : 葵青劇院

第一次去呢個劇院 好明顯係新進設計 D座位設計得非常之好 從未試過坐得咁舒服

行與行之間闊到不之得了 唔會再被人成晚踢你張櫈 空調亦非常好 無帶外套嘅我 

凍左一晚 睇左大半晚 點解好似唔太自在咁呢? 突然醒覺 mic 嘅音量實在太大喇

即刻塞粒 tissue 作耳塞 oh....舒服晒

今次個坐位 係前排正中間 雖然都係太前 不過前面個位仲吉左 視野無阻

仲想點呀

套劇分10 part 有幾 part 都好有共鳴 :

1) OL出盡法寶為求自保 (坐office嘅人 一定明白呢個道理 尤其呢個時勢)

2) 玩facebook上晒腦嘅潮童 滿口懶音 雖然我無玩 pet society 唔太清楚 details

   (我依家都俾餐廳洗左腦囉)

3) 半夜7仔嘅顧客 (我曾經真心想去做通宵7仔架)

4) 喪屍般的超市師奶 梁老太爆出唻果野 嚇到我彈起 

   (我屋企樓下間超市 真係有好多喪師)

5) 白蛇傳果 part 初初都唔太明 後來先知原來係諷刺蛇王高官

   (ah dee 條脷勁搞笑) 

6) 香港人 誰都試過致電什麼 hotline 經常都想打爆個電話

    (尤其你有朋友做 hotline 佢地講嘅情況真係如劇所講一樣架)

開幕同閉場嘅歌舞都非常精彩 尤其尾場嘅 jai ho 拍手拍到手都爛 

(我真心想起身一齊跳架 但旁邊嘅人 完全無任何動作 我相信一企起身 肯定會俾人鬧)

果D印度服飾 喺台上非常搶眼 十個 good呀 所有劇員 都發揮得好好 仲請左朱薰參與

演出 雖然以前睇森小都睇過 但今次佔嘅戲份比較多+重 更有得發揮

由season 1 嘅 Rosemary 變成 season 2嘅 Angelababy

佢果對高踭鞋呢 淨係望都覺得恐怖 可以著住喺台上活動自如 

究竟要花多少工夫練習呢? 辛苦晒

不得不提 阿祖已把基米高發揮得淋漓盡致 雖然基米高喺幾個劇

都出現過 但每次出場 仍然係全場狂呼 絕唔會令人失望 勁

ps 1: 尋晚離場行去車站時 聽到前面兩位'太太' 有這樣的對白

太太A : 都幾悶呀呵 我瞓左半場

太太B : 係啦係啦

太太A : 有幾次我都想起身離場 但又好似唔好意思

太太B : 係啦係啦

豬頭炳心聲 : 小人去睇小人國....

ps 2: 尋晚喺場館冷親 今朝醒來 喉嚨痛 (呢個係我感冒嘅先兆)

ps 3: 呢篇blog 由朝早 8:27(早餐前) 打到 18:10 (食完晚飯) 假期就係咁散漫

冧到爆 2

頭先睇左 小人國 2未開場前 去書局買左本 '冧到爆 2'



搶救零浪漫情人零FUN戀人大改造
每日冧足100分各大書局有得賣喇 
支持下啦喂

PS : 小人國 2 後感...聽日啦

完全中毒

我應該係癲左喇 尋晚上床後 碌左幾粒鐘都瞓唔著 3:00 仲好精神
全個腦不停轉 點設計間餐廳好呢 D枱點擺呢??



" 尋日情況 "



" 今日情況 " 

已經多左好多嘢喇 dee..... 清醒D呀

豬頭炳

今日有同事請飲下午茶 又唔知點解D同事咁鐘意叫死一間
老實講 真係麻麻地好味 向來唔貪人家野食嘅我
因為 lunch 食左隻傻子 好快就有餓意 就係咁
跟人家叫左碗糖水 呢碗楊枝金露 真係大膽
搞到我疴左五次 一切都係貪食之過

栗頭老師

每一年 逢親端午節都會出動
但平時 我完全唔知道佢被收埋喺邊架喎

登...登...登...登...



每次見到佢 都覺得佢極似IQ博士裡面 栗頭老師個頭 
極唔合比例的 呢個煲 原來大有來頭架 佢年紀比我大 
話說很久很久以前 老爸專登買佢唻浸鹵水鵝 推木頭車仔擺街邊 

當時我哥才剛出世 媽要揹住我哥 出去幫手收錢 

結果被我阿嫲鬧餐懵兼強烈反對 所以老爸只好放棄心頭好 

(唔怪得佢間唔中 都話要去擺街邊賣鹵水鵝啦 原來係咁)
由細我都叫'糉'做傻子 咁點解呢又 話說小朋友年代 

每次經過粥檔 都見人掛個'糉'字出唻 當年唔識字啦
就問哥喇 : 點解要掛個'傻'字嘅

我哥當場爆笑 : 傻子呢個係'糉' 食得嘅
結果傻子就跟我一世喇

我家從來唔會出去買傻子嘅  外邊D傻子 有一陣怪味架

而且以往我都唔食任何節日食品 係前年先第一次食傻子 

老爸的傻子 按照老媽的口味去包 大量紅豆+眉豆+綠豆+花生
結果糯米只佔極少量 所以唔太滯架

我依家好餓 盡快去瞓先

極度沉迷

近排經過每個同事個位 都見人玩緊呢個 game
上星期六 開始 我都加入戰團
初初都好迷糊 完全唔知點玩問人再問人 
到今日已經陷入狂迷

失色週末

前日先影D好靚天色 點解星期六/日先唻落雨
雖然唔係話要去邊到玩 
但望住窗外滂沱大雨 人都懶洋洋



成個 week end 都係灰色

早晨呀....

今朝晨早醒左 同返唻食早餐的老爸 say morning
等佢心情好D 人都開心D

哇 個天靚到不得之了 留個倩影先

點解D色咁差嘅? 眼睇D藍色明明好靚架影咗好多張 都無張滿意
研究過後 原來 setting 錯左

set 多幾 set 天都光咗好多 係咪好靚呢
時間尚早 眠多一眠先

升天

今早同老爸一齊出門口 佢放假 出九龍買潮州小食
喺大堂 佢對呢個景色 嘆為觀止

仲要求我影低佢 okok 影就影啦 雖然佢好質疑我部手機影相嘅質素

連 zoom 近都ok 啫
我心諗 : 好普通啫 落雨過後 多雲D好正常
點知佢突然爆出一句 : 似唔似人升上呀?
升天.... 老爸應該係掛住剛升天的姑媽

印花狂熱

唔知幾時開始 各大超市呀 食肆呀 好鬼鍾意叫人儲印花
有時候 真係好怕自己睇中果D換購品

點知...今次又中招

想要果隻 bear bear 竟然要 130 個印花
屋企附近間惠康對拉住買餸車的老媽 極唔方便
要上落樓梯 叫人卻步喇

各友人們 如果你手上有惠康印花 
請留俾我 萬分多謝

呢邊正在煩惱 那邊又開始另一項任務
renew member card 都要儲印花
儲左 6個 仲有一半
但我依家對壽司無晒興趣 點算好呢

各自反醒

喺余宜發個 blog 睇到呢篇令人感動的圖片

相中是他的妻子倒在路旁 她在低空飛過一條馬路時被車子撞倒
傷得很重

他照料她的愛妻 為她帶了食物與愛

當他帶著食物再次回到她身邊時愛妻已逝去
他曾試圖搬動她的身體... 
對於燕子來說 這是十分罕有的舉動

即使以愛的呼喚 愛妻依然沒有回應



此時此際 只能報以悲鳴



終於 他意識到原來愛妻已經死去 除了傷痛 他還能如何

這是法國一位攝影師所拍的照片
他以極低的價格將照片賣給法國一間十分有名的報社
幾乎所有人都為這輯照片哭了 誰說動物無情 你現在有何想法

鳴謝 abunawaf.com

小小的動物 都可以有呢D行為 但人類就不停互相殘殺 
甚至傷及無辜 你從高處拋下鏹水 你知道傷害性有幾大嗎? 
你見到滿街傷者被你弄得滿身傷痕
你會過得開心一點嗎? 萬一有途人被淺到眼睛盲左 你真的會很高興嗎?
你的良知 被野狼擔走了嗎?

送別姑媽

呢兩日 送別了姑媽
一心以為 是姑媽細佬的老爸 都叫近親啦 
原來...事情並不是咁嘅 
由於多個理由關係 守夜當晚 我地竟然未能安排坐入靈堂內
我地一班親友 就如陌生人般 在門外企企看看

對於呢個安排 我係滿心奇怪的 原來我地什麼儀式都唔需要參與嘅
回家路上 我問媽 : 點解我地同姑媽家的親友 感覺上總是隔得很遠 
反而大伯家的親屬 感覺來得親切得多呢? (兩家都係一年見一次)
媽傻頭傻佬的說出一句 : 大伯家同你 "同姓" 嘛
我頓然晃然大悟 可能就係呢個關係 每年我都非常樂意到大伯家拜年
反而姑媽家就.... 唔通真係有關係?

今朝 送姑媽上山 雨落得越來越大 情況有點狼狽
但回家後....











天色好得很
永別了... 姑媽

開心大發現

啱啱同好友C 食左一頓好美味嘅晚餐

原本打算去'和民'嘅 喺等位期間
飄過佢對面有間叫 "牛陣" 

望下個 menu 一望 "豆乳湯底" 相信係我孤陋寡聞喇 

完全吸引近排迷上豆漿嘅我自稱得牛陣 梗係主要食牛啦 
有幾個套餐選擇嘅 90mins 任食

第一次試 唔要最平(澳洲牛肉) 唔要最貴(日本和牛) 

揀個中價嘅(澳洲頂級牛肉)
我只係想試佢個豆乳湯底 咩級數嘅牛肉 已經唔重要



話咁快 一大煲豆乳就送上枱 咁多泡嘅?



呢碟就係頂級澳洲牛肉喇 任食嘅



點知越滾越多泡 over over 牛肉 你聽唔聽到呀? 成功救出人質



呢D配菜(唔值錢啦) 當然又係任夾任食



呢個芝麻醬 用唻點牛肉 絕配



滾多幾滾 煙很大 但泡泡漸消散



食到個口熱辣辣 好想食雪糕 雖然只係牛奶公司出品 好滑喎
食三球 飽到呢....

由於太飽 瞓唔到 漏夜都開著部電腦非常滿足的一餐 有機會再食
唯一唔滿意 佢喺 90 mins 後一定要你離場

其實你收左個煲 俾人坐下都得啩 又無人等位

生日禮物 2009

今年無咩特別野想要



舊年收的禮太大了 而且我應承5年內唔再要禮物
所以今年得到小利是一封 原本只要求媽俾利是我袋住
老爸知道後 唔執輸都給我一封 仲放喺我地嘅秘密基地
這5年嘅承諾 今年守得住



自己送自己嘅心水選擇 好靚



其實無禮物嘅其中一個原因 咪係呢隻衰錶囉 唔適當嘅時候停左
自動錶嘅'好處' 就係耐唔耐要拎去抺油
點知...竟然要$1,550.00
成架車俾佢食左去



友人送我的手機繩 想要好耐



仲係雙面的 非常好

但我掛上手機一日 已經有兩次差D飛街
因為佢纏住袋內嘅物件 一用力扯 電話好易飛街架喎
只好另搵地方安置 手機跌不得呀

瘋人瘋語

小人....真係周圍都有 
但若然連家中都有 何其哀哉
話說呢個小人 喺舊年生日時 多番要求我送佢名牌介子 
ok 你講到咁喜歡 咪送你囉 有咩所謂啫 一年一次

好喇 到我生日... 禮物我都無要求 
因為我想要的 佢一定唔會送嘅
我只要求食一餐飯 結果得到一堆瘋語

豬頭炳 : 今年生日 我要去上星期日 電視節目內介紹果間扒屋 (興致勃勃)
小人 : 吓 生日咋喎 唔使咁巴閉呀
豬頭炳 : 唔係好貴之嘛... (心諗: 我又唔係去福X門食鮑魚)
小人 : 電視介紹得果D 唔會平得去邊啦
豬頭炳 : .... (心諗 : 都係一年一次啫)
小人 : 你上網 search下幾錢先啦 話唔埋成千蚊架
豬頭炳 : ....
小人 : 你唔好以為我真係好高人工先得架 我唔係多你好多咋
豬頭炳 : .... (心諗 : 下...你至少高我 1/3 人工喎)
小人 : 我都好窮架
豬頭炳 : .... (心諗 : 你窮又借三皮比人去旅行 仲面不改容添)
小人 : 你自己睇下先啦
豬頭炳 : okok 我唔食喇 (講到咁 仲有咩好食啫)

過幾日 sms 又到
小人 : 今日有無約人食飯呀?
豬頭炳 : 咩事架?
小人 : 今晚同你食飯 有無興趣?
豬頭炳 : 無興趣 多謝晒 唔使客氣喇
小人 : 唔好咁小氣啦
豬頭炳 : dee拿聲 (仲係我小氣 你無病嘛)
小人 : 食咩都得喎
豬頭炳 : 依家我咪食緊風囉 仲食咩啫
小人 : 小氣鬼
豬頭炳 : ... (無病 收皮啦)

我情願食風 都唔再希罕你餐飯呀 但我永遠都都會記得你點對我架

講完

母親大人節

又到母親節喇 希望電視機呀 電台呀 
唔好再播 "真的愛你"
呢首歌 問題唔係首歌唔好聽 
但實在播得太太太多年
好厭好煩 首歌已經被播爛左喇 
停呀停呀

我家向來無慶祝呢D節日嘅習慣 一來老媽唔喜歡出街食飯
唔記邊一年 又唔記得邊個提議出去食 
結果換唻一餐'垃圾 & 受氣'嘅父親節飯 
印象太深刻 之後無人再提議呢D時候出去受氣
而且我日日都同佢食飯架 唔使喺呢一日做'工夫'喎
老媽份人向來實際 送錢俾佢最啱 但呢D無心意嘅行為
哥已全包了 鬼主意多多嘅我



送佢一樽 King size 嘅 Kimchi
味道 very nice 架

其實之前已按佢嘅要求 送左隻保溫杯
(呢 喺畢打自己人到 毛舜筠成日拎住唻飲果隻呢)
佢見人地靚 又話想要 但佢向來唔飲熱嘢架喎 
不過佢話想要 咪買俾佢囉
點解無相呢咁... 因為佢話已經收埋左喺一個我唔會搵到嘅地方
雖然我好喜歡貪新忘舊
但你隻杯我唔喜歡架 小姐

近日老爸嘅心情因姑媽過身以頗低落 
而且唔知係咪作感冒 定係電療後遺症 
無晒胃口 甚至又嘔(佢最怕) 令媽甚擔心
所以一個人嘅情緒 絕對影響健康
老爸請你多加保重 小心身體呀

實際的手信

我個 senior 淨係喜歡去日本旅行 都好...日本手信 絕少會失望
以往嘅都係一D擺設呀 小玩兒呀咁囉 向來喜歡無謂野嘅我 非常滿意

點知..今次嘅手信超實際



拉麵 仲要煮添 一諗到要開火就頭痛
你叫我做咩都可以考慮 煮野呢... oh no



都係留俾老媽啦 賣相OK 至於味道呢... 我連湯都飲埋 點形容呢
 食晒成個麵 都無任何一粒字飄出唻

老媽好驚訝咁問我 : 好好味咩
向來禁止人飲果D湯嘅我 竟然飲晒
豬頭炳 : 唔好味喎 但食晒都唔知咩味 想試真D咋



唔好以為得盒麵呀
仲有一塊 草蓆杯墊 聽聞唔同嘅織法 係有唔同嘅祝福意思架
若然俾我抽到紅色就好lu
講完