繁忙的一週

今個星期 辦妥晒去台灣的機票呀 酒店呀 甚至連 visa 都搞掂埋
餘下的時間 就可以安排一下行程 

友人說 讀書都未有咁勤力 晚晚返去'咪'書
我呢...就無咁勤力喇 因為呢... 

呢個 game 真係好難玩

頂呀 釣左成個星期 95%都係垃圾 & 海草

我想要魚呀 更想要蟹

繁忙的一天

今日原本係長週 但電腦部話朝早要維修 server 
要我地下午返公司試下 後來又話技術性問題 
可能連下午都唔使返 要等電話喎 ok 咪等囉
點知等到 14:30 都無電話 梗係以為唔使返啦

點知有個同事突然打唻問我喺邊 
點解唔返工 下!! 我無收到電話喎
原來佢地話無電話就要返工 點解次次都安排得咁差架
最最最搞笑 返去試無 30mins 就話搞掂 
~ 玩野 ~

今日已經將澳門的船飛/酒店事宜辦妥

接落唻就可以慢慢研究台灣嘅行程 但手上嘅旅遊書已經唔 update 
所以要出動去書局 打佢一個大書釘

對台灣一D概念都無 睇左個幾鐘資料 猛塞D資料入腦
隻手又不停抄抄抄 結果... 頭好暈 手好攰 肚好餓

去左 沙爹王 醫肚

每次都會叫的 沙爹炸魚粉絲 20級好味

炸魚係分開上枱的 不得不提一下 張隔油紙極少油的

呢個係鮮蜆周打魚湯 友人激讚

蝦多士 計埋今次我估我只食過3次蝦多士 但無一次係唔好食嘅

呢張相特別暗 果然同佢實際嘅味道一樣~麻麻
呀 其實呢個係軟殻蟹

可避免的意外

屯門一間洗衣工場昨日發生恐怖奪命意外 一名18歲巴基斯坦裔少女
在工場操作一部大型滾軸熨布機時 懷疑一頭長髮連同頭巾意外捲入
機器 少女高呼救命 惟身邊的女工不知所措 慌亂間未有及時關掉機
器 眼巴巴的看着少女的頭顱和上半身被捲入機器內 夾至頭爆骨碎 
消防員到場要拆開熨布機才可救出少女 惟已返魂乏術

點解咁簡單嘅工業安全都唔識架

操作呢D機器 點解仲要著長袍 又要披頭巾呀 知唔知危險架

我知道好多老闆都會請巴基斯坦人做野 相信係因為人工比較平 
但都唔可以忽略呢D工業安全嘛

意外已經發生 依家講咩都無用啦 不過呢D意外 絕對係可以避免的

又再慶祝

友人J知道我的激光矯視手術非常成功後 說要慶祝一下
(我自己都慶祝左好多餐喇)

突然收到吹雞飯局電話 真係話食就食喎
撥完一大輪電話 終於搞掂

今次飯局嘅地點 又係呢間dry(齋)店 ~
大自然素食

呢碟係雞絲粉皮喎 芝麻醬係無嘅 好彩D粉皮都幾爽 幾好味

呢碟係蜜汁燻方魚塊 味道呢... 應該唔差 不過我已經唔記得左係咩味
但肯定係無'蜜汁'味嘅

呢碟係西檸雞 味道唔錯嘅 尤其點埋佢個汁汁

食dry 食到要叫乳豬 呢D咪係齋口唔齋心囉
全枱人 一致認為呢碟係最好味嘅

賣飛佛芋頭魚
呢間野 炸到條魚尾係飛起嘅

友人突然好想食壽包 生日飯都從未食過壽包 反而今次就...

同場加映 : 曱甴菜一碟 佢原本叫咩名已經唔再重要
個店員仲好搞笑咁講 : 做咩會走咗落去呀 
講到好似識佢咁 識就睇實D嘛

PS 1 : 近排真係非常忙 講左N次嘅台灣旅行 
終於決定起行 仲要係自由行
對於從未去過台灣嘅我 要自己決定行程 
係有一定嘅難度

PS 2 : 台灣之旅仲有一個月時間去準備 
友人又突然提議先去澳門走轉
go go go 去買飛船先

無奈放棄

聽日係書展開幕嘅日子

每年都必定去湊熱鬧

但今年開始無奈要放棄

因為屋企實在太多太多書喇

放到攻埋衣柜

連衣柜D吉位都 full 埋

依家買書要極度審慎 多一本就少一個位

來日若然屋企可以騰出空間 我一定會再戰江湖架

依家要睇 去書局打住書釘先啦

無意思的九號波

尋日嘅氣溫 實在太太太翳焗 37度 喺屋企淨坐 都會流汗
極度怕熱的老媽 晨早就嗌晒救命 到下午時候 更有頭昏腦脹嘅感覺

黃昏一場雨 亦無咩大幫助 終於頂唔住開左冷氣 佢當堂'復活'返

今次呢個風球(莫拉菲) 好似來勢洶洶咁 果然 23:30 就改掛8號波
到半夜 01:30 仲改左9號波 

可惜... 幾多號波都唔影響到大家 除左要喺半夜返工嘅人 

包括老爸 成間酒樓 只有一半員工返到工

佢個上司尋晚直頭喺酒樓瞓 果然係好員工

今年第一個9號波 就喺大家瞓覺嘅時候過左 無意思.....

落左成晚雨 終於降溫了 唔該晒

1星期後覆診日

激光矯視後 一共要覆診 5 次 今日就係手術後一星期的覆診日

由於度數仲未定 所以都係求其驗下眼 成個過程只係 15mins 搞掂晒兼走得

趁有機會 我立即問下我隻白內障眼 醫生話只要一日唔影響我的視覺
就唔需要理會 因為醫生話 唔似係精體退化 放心晒

今日我決定獨闖九龍城 心口真係掛個勇字 應該唔會蕩失路 

近排我的口頭禪 : 路在口邊 

連由浸會搭咩車去九龍城都唔識 除左Taxi 另一個辦法就係問人啦
好彩遇著個好人指點 成功到達九龍城

去九龍城主要嘅目的 係想買好出名的蝴蝶酥 (賣飛彿)

個盒無 Jenny 嘅 bear bear 果D咁靚

但係呢 同人一樣 唔好淨係睇外表 內涵先係最重要
味道非常好 最最最重要 係唔太甜

講開健康食物 今朝去間餐廳 好似又係咩健康食肆
成碗湯無味的 我這濃味怪
連友人平時食開淡 食左一啖 都爆左句 : 無味嘅

兩碗野上枱時 都好似好吸引呀 點知... 
都話唔好淨睇外表啦 好彩... 下午 食左餐好嘅

嘩 翅呀

叫左一小煲 share 都有好多 醋王即吃醋

去泰國菜館 唔可以唔叫咖哩蟹

叫左咖哩蟹 又唔可以唔叫個法包 點D汁汁
蟹痴的我 品嚐呢碟蟹嘅時候 隔離枱個小弟弟 
定眼望實我不下數十次 我落手落腳食呢 一係因為我D筷子工極差
二係因為實在太滋味喇  並不是我個人粗老

附送一張蟹蓋相 講完

魚生飯

那個魚生飯 曾經走樣得有點離譜 
甚至放棄左一段時間

天口實在太熱 若然再食煱物 個口肯定反抗
魚生飯係不二之選 好彩水準回復正常
無拉拉仲有朵小菊花添 
呢D咪整色整水囉

Get 唔到

近排有個廣告成為城中熱話 有D人話好好笑



完全 get唔到成個廣告嘅 meaning 覺得好無聊 甚至有點討厭
連老爸某日經過電視 都開口問 : 兩條細仔隻眼抽筋得咁嚴重

繼續高興

呢幾日 真係食過不停 今次輪到 Ricky生's 壽司店

我好似第一次幫襯 原來係逐件計的 雖然係貴D 但又好似新鮮D

哇 又係鰻魚

好耐無去過海運 未踏入商場前 已經見到呢幾條骨魚 一點肉也沒有

PS 1 : 做完激光矯視 好應該俾對眼休息 但唔通由朝瞓到晚?
唔開電腦 唔通睇書? 書D字咪仲細粒 仲嘥神啦

PS 2 : 友人們都說我'重見光明' 其實呢....我唔係盲左 
只係近視啫重見光明唔係用唻形容我架 不過都多謝各位
尤其曾經擔心過和祝福過我的 有心喇 收到晒

最後請各人發揮念力 "保佑我零度" 

(會唔會太貪心呢)

值得慶祝

今日一早 我地就要返醫院覆診 期間我地一直都要扮'咸蛋超人'的

去食早餐啦 搭巴士去醫院啦 固然我地都會戴住副太陽眼鏡遮住

但仍然吸引到某D途人 報以奇怪的目光

香港人 實在太八卦喇

去到醫院 今日病人好好好多 好多公公婆婆去睇醫生

所以等左 long long time...

姑娘幫我地除去對咸蛋(眼罩) 俾左一大堆眼藥水

教曉我地滴藥水的次數 保養眼睛的方法 要注意的地方

我地就走得喇

由於心情緊張 成日想食野 所以呢幾日都不停食食食

又一城呢間餐廳 食過幾次 都唔錯架

餐紙上 職員寫上一堆密碼

其實就係我地 order 的東西

先唻兩杯鮮果汁 友人叫的三莓汁 但唔知點解 紅紅黑黑的

我的雖則顏色正常 但味道怪怪的 明明係蘋果+芒果+ (唔記得咩)

溝出唻的味道係梨味 但明明無雪梨架喎

白酒煮蜆意粉 每次都有 order

但今次D蜆肉甩晒唔知去左邊 十隻殼 得五粒有肉

哇 鰻魚 pizza 好好味呀

人生中的重大日子

今日係脫離四眼一族的日子 (一定要成功呀)

由於決定唔返屋企瞓 喺醫院附近搵間酒店休息一夜

手術係 16:45進行 但要遷就負責碌咭的哥哥

我地提早去到醫院 原來早到可以早做架

友人先做 但點知...換好手術袍 等左粒幾鐘都未叫名

期間我已餓扁了 結果飲左六杯水頂住

等到 18:00 先輪到我地
(後來先知道 原來有個男人超緊張 搞到問題多多 延誤晒)

手術第一部份 先射層激光切開眼角膜

手術第二部份 就用激光幫你矯視
(終於聞到傳說中的'燶'味 但我覺得似燒焊味多D )

由於滴左麻醉藥 所以可以話係零感覺的

而且成個過程比我想像中快好多

醫生再幫我地檢查過後就可以返去休息
(最鐘意皺眉的我 俾醫生嚴厲警告 : 停手 )

因為無人接走 我地兩個'咸蛋超人'(雙眼貼住透明眼罩) 飛的返酒店
期間個的士司機對我地呢個手術超好奇 最後仲叫我地俾張醫生咭片佢
如果有介紹費可以 claim 返就好喇 盲摸摸咁衝入酒店 狼吞一個杯麵後
立即上床休息

哇... 麻醉藥過左 感覺就唻料又唔講得上好痛 但好刺好'拿'眼囉 十二分唔舒服 
友人仲不停流眼水

扮屍體幾個鐘頭 其實一D都瞓唔著 到 1:30 突然醒左
所有刺痛的感覺終於過晒

一開眼 喺在眼罩的小孔子偷望 已經睇得好清楚呀 哇!哇!哇!哇!

實在太高興喇 即刻叫醒友人 大家測試一下 狂歡左一輪 要繼續休息喇

激光矯視前檢查

今日去浸會做激光矯視前的詳細檢查
心情...好複雜 又興奮又緊張

由於 book 左朝早10:00 又怕會遲到
預多左的時間 來個豐富的早餐吧

食 係最可以令我放鬆心情 可惜因為太緊張 

胃酸倒流的情況又出現

先唻救命 mocha (太早起身 神智未醒)

全個餐 +錢換杯粟米 原來我個餐已經有粟米

疑似隔夜牛角飽 oh too bad 蛋同件魚柳都 ok

友人的餐 影低佢嘅目的 係想證明自己孤陋寡聞

波菜炒蛋 第一次聽/見

********************************************************************

食過早餐就出發去浸會 踏入佢個矯視中心 
姑娘一聽到我係戴開 hard lens

即刻話未必可以做喎 初初話只需要停戴3星期
我都停夠一個月啦 都唔夠 玩野
經過一輪檢查 左 check 右 check 好彩手術係無問題嘅
戴左咁多年眼鏡 驗眼經驗都相當豐富 但喺醫院驗眼 
佢俾你睇D字係超細粒的 大部份我都係睇唔到
驗完一大輪 瞳孔都放大埋 終於見到醫生
佢嘅說話 嚇我一大跳

Dr : 你D視力都幾差架喎
豬頭炳 : (心諗: 我覺得睇得幾清楚架喎)
Dr : 你隻眼個水晶體唔太靚 好多一點點
豬頭炳 : 吓 (心諗: 唔係嘛)
Dr : 你有隻眼有天生白內障
豬頭炳 : 吓 x10000 (心諗: 我仲睇到野喎)
Dr : 不過都唔影響我地今次個手術

鏡頭一轉 去到另一邊繼續講
Dr : 你嘅度數太深 我地目標係少過50度 少過50度就叫成功
豬頭炳 : .... (仲俾白內障嚇呆中 唔識反應)
Dr : 如果多過50度 我地有個增進手術 幫你補救
豬頭炳 : .... (仍舊發呆)
Dr : 個增進手術係免費嘅
豬頭炳 : ..... (仲未回到神)
Dr : 依你個case 有百分八要做個增進手術 (請照讀一次)
豬頭炳 : 吓 (終於按捺不住叫左出唻)
Dr : 哦 係8%
豬頭炳 : (心諗: dee...玩野咩醫生 講清楚D嘛)
Dr : 好喇 姑娘會同你約手術時間架喇
豬頭炳 : (驚皇失措地步出診症房)

PS : 自拍了一張鬼眼相 媽說半夜見到都幾恐怖

(其實係放大瞳孔的相片)

透心涼

每年夏天 麥記都會推出一堆甜品

今年的 終於出籠
唔太飲汽水 又唔太喜歡雪糕的我 對呢款 巨峰提子新地樂 
出奇地喜歡舊年都飲過 好彩今年 encore 重來
其他甜品 等有機會 逐一試下

唉....

dee... 失聲明明都無食過咩熱氣嘢 點解咁呀
失聲唔係問題 喉嚨20級痛至大件事
食飯固然痛 連飲水都極痛

思前想後...

榴槤係喉嚨痛疑犯

荔枝係失聲幫凶
我唔要做張x芝~鵝公喉呀

天氣好 心情好

雨過後 果然天晴 雖然係熱 但係如果成日落雨 好悶架嘛
今日係回歸 12週年 國家事顧不了 家事忙不停 
陪老媽買餸返到屋企 得閒無嘢做 幫呢個好天色留個倩影啦

藍天白雲 呢個顏色 tone 真係望極唔厭

ps : 好多團體 都會趁呢D日子舉辦遊行活動 
真心質疑 呢D行為作用何在? 全個灣仔/銅鑼灣呢到封路 果到封路
其實要表達不滿方法都有好多 但唔好阻人嘛 
你要知道 一部巴士想過一條馬路 要等 45mins
係幾討厭呢 !