15年前的今日 第一日返呢間公司 係我第一份正式的工作 完全無諗過 一做就15年
當年只有17歲...
雖然有做過暑期工 但全部都係"玩"的成份
F.4 呢年去左當年仍未執笠的八百伴的美食廣場
負責清潔洗碗 我自己就覺得非常好玩 眼見一隻隻碗碟都洗得乾乾淨淨 感覺真好
另一份係等放榜時 又係跟同學去一間金融公司做 receptionist 粗略估計
每日接的電話有 50個以上 所以每晚放工 聲真係沙啞 做左 3個月
結果患上電話恐懼症
當年搵到呢份工 真係剛剛遇著啱啱 尤記得放榜收到成績單 完全無可能升讀 F.6
重讀一年 又極度唔想 結果只好搵工啦 當初一心搵會計的工作
會計...好多人都怕的工作 但我好喜歡呀 由讀書的時候 都已經決定做會計的
可惜見工時踫過幾次釘 無奈地降低少少要求 文職都照殺吧
因為搵唔到嘢做的心情 超灰
埋頭苦幹的睇報紙.... 打電話 大部份都是返去等消息 就係呢間公司
佢個招聘廣告極簡單 2個職位 (1是普通文員 2是會計文員)
一個電話 連地址都無喎 當年仲興打電話約時間見工
唔似得依家要寄求職信 (所以到呢一刻 我都唔識寫求職信架)
可惜喺打電話呢個過程已經遇上阻滯 對方說了一句 負責人行開了 留電話就收左線
一心都諗無希望啦 連份廣告都掉埋 當時我已放棄再搵會計的工作喇 普通文職都好啦
真係咁難? 點知... 隔無一陣 真係有覆電話唻喎 個女仔仲好好心咁教我點搭車
(當時我仲係住屯門的鄉下妹) 點去到佢間公司 最最最好的消息 係普通文職已請咗人
問我會計文員有無興趣 yes yes 當然有興趣啦 見工後第二日就返工了
仲竟然有15個月糧添
當年得17歲 簡直係一個黃毛丫頭 幸運地遇上一個好上司 他對我真的非常好
絕對是呵護備致...工作要認真 返工要準時 放工都要準時 出唻做野 除左求財
誰都希望能遇上一個好上司 將佢一身的功力 慢慢傳授俾你... 如果沒遇上你
我的工作生涯唔會來得咁平坦 雖然依家已轉到其他組去 (都係你為我一心安排的)
沒想到你一直仍與我聯絡 多年來得到你的照顧 我真心要多謝你
固然有好多人認為我不求進步 但每個人追求的目標唔同 我真心鐘意呢份工架
沒有留言:
張貼留言
注意：只有此網誌的成員可以留言。