清心棧

兩個幾星期 電視依然不停重播菲律賓人質事件
我明呀...但已經播得太多喇...夠喇

大家唻枝清心棧



將所有壞心情騎劫

大家強力要求菲律賓政府要查出真相 唔知點解 我有好強烈的預感
這無賴的菲律賓政府最後會說出 : 只是幾條人命 沒什麼大不了
以佢地匪夷所思的處事方法 + 事後異於常人的反應
呢D說話絕對講得出

Final checking

上星期六 屎忽痕 走去相熟的眼鏡店 叫人幫我驗下眼
點知...驗光師說我的眼角膜有點皺了 可能係激光手術後遺留的

最嚇人的 係我眼珠旁邊有粒野 唔知點解會有? 幾時有? 但出現左好耐架喇
但驗光師說 如果佢有變化 好可能就係D唔好野 = cancer



聽到呢個字 真係嚇得三魂唔見七魄 即刻想搵個專業醫生睇下突然又記起 
激光矯視最last 一次 check up 唔記得左去

晨早打去浸會問下 己經過左期 可以補返嗎? 幸好仁慈的護士肯通容一次 
同我做手術的梁醫生已經無喺浸會掛牌喇 出左去自己開診所
作打風的氣溫 條街實在焗呀 上到眼科中心要量體溫 竟然 : 有燒
姑娘說 可以去洗一下面 (但水溫都是暖呀仲接近熱添) 再飲一杯凍水
隔多一陣再量 都仲係有燒 姑娘批准我唔使戴口罩 通通風

就係咁呆等左30mins 體溫終於降返低喇
正常程序 : 去呢部機望下 去果部機望下 再讀下"鼻屎"字
(D字細到呢... 聽聞消防員都係用呢D字去測試)

這比較年青的醫生有點驚訝 以我咁深近視+散光的度數 
手術效果竟然咁好 其實我最關心都係果粒'野' 
醫生都好詳細講解左我知 然後再幫我放大瞳孔檢查
檢查後的結果 : 依家最大的問題 只係外觀啫 輕鬆晒
但醫生都見議我每年做一次檢查 okok 你話事

以為陽光唔算太猛烈 點知一踏出醫院 很刺眼 
好彩有黑超 但有條友竟然唔識驚 
喺半盲下都要冒死走去食壽司 
(因為等退燒 & 瞳孔放大時 個肚餓得怪叫了兩次)
又由於係半盲 完全睇唔到巴士站 各巴士路線的字 
就憑'感覺'跳上車 去到適當的站就跳落車

萬一我喺途中發生意外 報紙頭條就是 :
一名超為食的中女 為求果腹之慾 在視力不清的情況下 被車子撞到
幸好食飽左先跳上回家的巴士 途中竟然塞車 
一程巴士要 1.5 hrs 坐得我人都呆了

餘生

整個星期 大家的話題離不開菲律賓的人質事件

餐桌間 大家討論著菲警的救人方法/設備 說著說著

後來甚至說到不救人的幕後原因 (當然是胡言亂語的猜測啦)

你一言我一語 我都不大發言 老實說 事後話 多講也無謂

直至 其中一友人說 : 所以呢 去旅行 不要全家一齊去 留一個在家

好等有事的時候 都有人打點呀

我第一個反應 : no 要麼一齊去 唔去就一齊唔去 我一定唔要做留低果個

你說我無用也好 自私也好 什麼也好 留低的餘生都唔會好過呀

整個星期 看著電視機的螢光幕 事情每一個鏡頭 一直都歷歷在目 

心口總好似壓著大石 透不過氣

正如今次的事情 令到多個家庭支離破碎 死傷的當然悲痛 但生還的 

餘下的日子應該怎過呢? 如第一對被釋放的老夫婦 訪問中他們說一

直都不能入睡 陰影之大 可想而知 竟然要用幾多時間去平復心情呢?

如果一家旅行 回來的只有我一個 以後的日子要怎過? 

還要獨自面對一切 處理後事

經過近年發生的事 原來自己並不是想像中的堅強呀

隨著記者訪問事件中的生還者 披露出菲律賓政府處理手法上好多疑點

唔專重死者等等 唉...其他的都不說 最重要的佢地根本係無想過救人囉

唉

由尋日開始 陸續有 blogger 決定唔再寫 blog or 轉成 private blog

係我最喜歡睇的 之前已經有一堆人離開 yahoo blog 亦係我喜歡睇的

雖然唔知咩發生咩事 以文字間的了解 應該係有D惡意的批評

令人家認為再寫已沒意義了

喺 yahoo 最受歡迎的 blogger 家裡都有小朋友

人家又要忙湊仔/女 都寫努力 blog 當然佢地都係想留一點回憶(俾自己)

順道'分享'給我們一班完全唔關事的外人

誰想倒頭來 給人評頭品足 惡意中傷呢? 甚至連小朋友都唔放過

做父母的 第一個反應 當然係保護孩子啦

結果我地'純欣賞的'就無辜受牽連

唉.... 以後無 blog 睇喇

其實我真心好想知 果D賣廣告的/色情的 佢地真係有心有力

mon 住晒所有 blogger 人家每有 update 任何時間都有能本事

第一時間留言 其實真係好浪費時間架喎

不如多為自己的人生做點事啦

人家的幸福快樂 令某D低智能人士 產生妒忌 然後作出超低能反應

如果睇任何文章/圖片 令自己不快 請善用 website 最右上角的 "x"

所有你們的眼中釘就會消失架喇

然後...好好增值一下自己 提昇自己的智能 損人不利己的事別再做

Blog sharing????

剛剛發現左一件超低能的事
喺訪客中 竟然有條戍利 將我個 blog 搬字過紙

http://hk.myblog.yahoo.com/aa381237

你不能怪我 post 你條 link 出唻 你的不仁 令我不義或者 
你嘗試解釋一下因由
(雖則我向來唔太聽解釋)
請你盡快將 blog deleted

重申 : 本人並唔願意將 blog 分享到任何人的 blog 裡



咁鐘意抄 贈你喇最後勸一句 : 為自己的人生做點有意義的事

挾持事件

康泰旅遊巴在菲律賓被挾持事件

事件發生在早上9時許 一名被解僱的55歲前警察
強行登上康泰旅遊車 他持有M16自動步槍 當時車上有25人 
其中有20名港客和1名香港領隊 其後槍手釋放了6名港人和
多名當地人後 車上留有16人 
包括14名香港團友 1名領隊和1名當地司機

事件擾攘差不多10小時 菲律賓警方一直與槍手談判 
並補充燃料讓冷氣繼續運作 槍手曾任警察和軍人 
因涉及多項控罪而被解職 他感到不滿 他要求記者到場
但不獲接受 

在大約晚上七時許 旅遊巴突然移動 警察開槍射爆車胎 
從直播電視 畫面所見 之後再傳出槍聲
晚飯的時候 電視突然轉播'特別新聞報導'
初初消息說 : 所有人質全部身亡
這新聞報導持續左 2hrs

一枱的飯餸無人再掂過 大家都放低晒碗筷
全晚睇住果班無能的特種部隊以'玩泥沙'的方式去救人
既忟憎又勞氣 心很不安
你話若然有親戚喺車上 心情如何激動呢







事情最後喺血腥中結束
誰對誰錯 已沒意義了
死者一路好走 家屬們請節哀順變

喺現場的直擊報導 不時傳出旁邊有人竟然仲笑得出 

原來人命就是如此XX 
(詞窮 + 想不到任何適合的形容詞 請自行填上)

這感覺很毛骨悚然

厭惡

呢個 Yahoo blog 好X(自行配上各類粗言穢語) 討厭

問題多多 : save 唔到/edit 唔到/ upload 唔到相 / upload 到都隨時無法顯示

鑊鑊新鮮鑊鑊甘

我要好認真考慮下 再唔再繼續寫 究竟仲要啞忍到幾時呢?

絕對相信 出問題唔止我一個 但改善係: 零

我亦知道 好多人已經放棄喺 yahoo 寫 blog 但轉去邊呢?

總覺得會有一日 無聲無色咁一次過 deleted 晒我地D blog

未作好心理準備前...

半場羽毛球

今日又係打羽毛球的日子 但友人喺三星期前打波時拗柴
一直都無完全康復過來

今日打到 30mins 終於要放棄喇 當然唔會因為浪費左果半個鐘以可惜啦
但受左傷真係唔好拖嘛 痛都係自己 何苦呢
既然打唔到落去 又去食飯囉 

(尋日先狂食一餐)



呢個麵 叫"四川蝦球兩面黃" (類似啦 個名實在長)
佢D有點甜有點酸有點辣的醬汁 真係令人好開胃
果D蝦球又係好新鮮 D麵又炸得好脆
兩個星期 打完波都係食佢 不過相信係最後一星期食喇

打完波跟手食呢個麵 唔得死咩
試過 嘆過 就好收手喇嘛 
年紀大 要睇住食



間餐廳有一D好特別的飲品 for 夏天
呢杯野有個好特別的名字 但我好努力咁記住頭先個麵
真係無能力再記多個名

我淨係記得 係四個字的

美滿

放工後 與S小姐去太子走左轉 為怕晚飯黃金時段大排長龍辦事前 
先食個 dinner 好耐都無食得咁豐富喇可惜....

所有前菜呀 主菜呀 都俾我地以狂風掃落葉式地送晒落肚



留到倩影的 只有甜品
每次食完晚飯 再加甜品 真係人生一大快事
但呢個甜品都好值得推介
這兩球雪糕很滑 + 朱古力蛋糕好濃 但唔太甜

不過好明顯 呢個係'增肥'佳品 又朱古力又雪糕佢仲要細心 
連隻碟都係雪得凍一凍的 但影無兩張相 
兩球雪糕已頂唔住喇

快樂的守則

喺公司的舊文件堆 終於搵返呢張發黃的 printout
唔記得幾時/邊個/俾我的目的 但真心多謝這個人
依呢張 printout 的發黃程度 估計收藏左好幾年
自從第一次睇過 一直好好收藏至今 文中提及過幾次的豬頭炳
亦是我個 blog 名的由來

大家看過後覺得有用 請各自 print 一份出唻 貼在當眼處
當然看過後覺得無聊 請盡快忘記 無謂霸住你個腦D ram

快樂的守則 每做到一項 快樂便多一點 你做到幾多項呢?

起步 :
01) 早上一起身便對鏡依起棚牙 開心的豬頭炳 幾時都開心過憂鬱小生
02) 當然 首先你要起床 難道要醫生巡房嗎?
03) 越早起越好 晏起床的人總好像不大快樂
04) 無論甚麼忙 一定要食早餐 而且一定要把早餐慢慢嘆
    一早起來就趕頭趕命 整天都會有著 (何苦) 的感覺
05) 大解後才出門

待人 :
06) 喜歡你喜歡的人 討厭你討厭的人 待人毋須平等
07) 無關重要的人誤會你 便由得他們一錯再錯吧
08) 告訴你喜歡的人你喜歡他/她
09) 無條件為你喜歡的人辦事
10) 無端白事送件禮物給自己喜歡的人
11) 待人以誠 對方不誠便立刻遠離 勿拖拖拉拉 做大戲才須好頭好尾
12) 任何條件也不為討厭的人辦事 雖小氣 免勞氣

裝飾 :
13) 不要在白鴿籠內建造羅馬柱
14) 客廳不置組合柜 空間頓增加七倍
15) 電視劇集裡的房子 才會在走廊口加設拱門 你不用那麼戲劇化
16) 別讓室內設計師把你的房子設計成他認為的理想房子 除非你打算與他同居
17) 豪裝的舒適程度 直逼飲衫 可免則免

財務 :
18) 不打算炒賣任何東西 便無忌
19) 賬單收到立刻付 便無牽無掛 蝕息? 蝕那一角幾毫 計也多餘
20) 可以送錢給別人 別借錢給人 當然也可以不送錢不借錢給別人
21) 可以有多少錢 就像可以勃起多少次那樣 並不是由自己決定的 毋須一天到晚數住
22) 有錢搵的機會 不一定須要把握 要是那筆錢教你搵得很辛苦
23) 間中買貴了物品 不值得耿耿於懷
24) 床單至少有兩張 信用咭只需一張

從簡 :
25) 不動用自己不懂的字眼
26) 不去了解自己不明白的人
27) 週未/假日不一定要有節目
28) 不講大話便不用記住講過什麼話
29) 不做作 便不用記著要什麼做作
30) 看不順眼的人物 別看 需要邊看邊罵的東西 一年頂多看一次半次好了 例如:港姐
31) 不用應酬你認為(應酬)的飯局/聚會等等
32) 把 appointment book 丟掉 除非你是醫生
33) 你不需要有兩隻手錶 當然更不需要兩副面孔 徒添維修費

接吻 :
34) 別濕吻你不愛的人 手尾很長
35) 更加不可濕吻權貴的屁股 乾吻~甚至輕啄也不宜
36) 接吻時請全情投入 別看手錶 別看股價 別看天地萬物
37) 保持舌頭清潔
38) 吻時別嚼香口膠 也不要把對方當作香口膠嚼
39) 有無人錫 都要自己錫自己

飲食 :
40) 每天至少吃兩個水果
41) 眼睛多吃冰淇淋 便可減少眼火爆
42) 路過涼茶鋪 不妨幫襯一下 有無幫助不重要 自己覺得好便是好
43) 茶樓酒館宜少去 免得二手煙頂你個肺
44) 雞肋及其他食之無味的東西 毫不可惜地棄之
45) 飲水 飲水 再飲水

睇戲 :
46) 遠離慘情片 尤其是那些真摰動人的 哽咽有礙呼吸 好辛苦
47) 看不明白大師級的電影 不用內疚 也不用扮欣賞
48) 睇戲當然要吃零食
49) 拒絕看配了廣東話的外語片 尤其是成人電影
50) 請女士看極度驚慄片之前 自己先獨自看一次 免得屆時出醜
51) 專心看戲 不分心在戲院偷錄
52) 睇鹹片時不要拗劇情

工作 :
53) 適可而止

得失 :
54) 過後不過得啖笑 記住起身依起棚牙 性感豬頭炳逗不到人也逗到自己

心血少

老爸的療程接近尾聲 (仲有3次)
今次大家都準備充足 老爸一直都食到野無輕到不特止 
仲肥左 醫生都說 : 繼續食 keep住就好喇

***************************************************************

呢個月 每日都係老媽陪爸去醫院我就照常返工 
老實講 如果可以 我都想陪佢但我點會有 33日假呀 
陪得一次 陪唔到兩次 雖則個人喺公司 但個心從未踏出過屯門
經常打返屋企 : 有無唔舒服呀? 食得多唔多野呀? 有無搽藥呀? 
等等等等佢地去左醫院的時間 隻眼不停望鐘計時間今日點解咁耐? 
部電話係咪壞左? 點解仲未響呢?
因為醫生事前提及過 可能會有一D好嚴重的影響 雖然機會率很低
但每日我都好提心吊膽 個人緊張到頂點

***************************************************************

尋日差不多收工 突然收到醫院電話 這個口齒超唔伶俐的女仕 
ee哦哦 講極都唔入正題 搞左一大輪 原來只係叫我地去拎返
之前放低過的 report 早講嘛

***************************************************************

今日突然收到老媽電話 話要去見醫生 下!! 咩事呀? 有問題?
講無兩句 就聽到嗌咪 : 莊xx 老媽即時收左線 (喂喂喂....)
喺短短呢 15mins 坐又唔係 企又唔係 好想即刻飛去醫院 佢地兩個
每次都聽唔清楚醫生的說話 兩個人轉述的說話 可以差天拱地

心跳到 100 乾等真的很難受 好彩只係 15mins 
否則我可能會心臟病發而死原來只是普通的交帶 感謝主

**********************************************************************

呢個月 長期處於緊張狀態 身體各方面都反常晒
好眼瞓好眼瞓 23:00 未到已經好(想)瞓 齋想啫 從未早瞓過
對好少眼瞓的人 呢個係超怪現象

好想好想食野 尤其最脂食物薯片呀 雪糕呀 甜品呀 正餐全無胃口 
(梗係啦 食咁多垃圾 )向來對雪糕 & 甜品 無太大興趣 依家晚晚食甜品

前幾日 連自己都覺得唔太對路 咁食落去 應該好快死
希望呢D反常 隨著老爸完成療程而盡快回復正常

***************************************************************

別再嚇我喇  心血少D真係暈低架

好奔波

今朝晨早 老爸突然說 : 快D刷牙換衫 飲完茶我要出去九龍城
下... 我地尋日先行左尖沙咀咋喎 今日仲行??

前日又喺公園疑似中暑 老媽唔會再俾你冒險喇
結果由我同老媽代走一趟

天氣很熱 去到九龍城老媽突然提議上街市食野 
YES 蘇絲黃介紹過架喎

點知...無開
結果 轉食泰國野



超彈牙的蝦餅 很好味但很熱氣



此泰國春卷 味道有點怪怪的
其實我係想要D生菜包住食架 但佢D生菜要另加 $5



老媽很餓 要食碗牛丸河粉
點知全碗野 都係香港出品 唔係泰國牛丸 又唔係泰國河粉



呢杯係芒果加冰打成沙冰 應該無加糖
結果...零甜 好健康呵



咁熱衷去九龍城 都係為左呢個



蝴蝶酥 很好味 但很貴 一盒 $98
(舊年係 $88 一年加 $10 所有野都瘋狂加價 除左我份糧 )
其實我真係想問下 sales 姐姐 我可唔可以自己帶個盒唻買
買一次就多個盒 似乎又唔太環保 又無可能 keep 住咁多嘛
最重要佢個盒唔太靚 這粉紫的顏色只令我諗起乳牛



呢堆超巨型牛丸 大過一粒乒乓波
(由於家無乒乓波 無得拍埋影相)
食兩粒已經飽



呢D都係大 size 魚蛋 雖然無牛丸咁大粒 但好新鮮



依家九龍城的千層糕 價錢貴左 件糕薄左一半
椰汁味欠奉



呢盆芒果糯米飯 上次竟然放水仙芒 (淨甜無芒果味)
今次用返呂宋芒 good

喺九龍城返到入屯門 再要去幫老爸買奶粉 剛剛先坐低

尋日仲唔小心 整到條尾龍骨舊患 隱隱作痛

頭先喺街市樓上的熟食中心食野 隔離枱為左影D'美食' 竟然出動三枝大炮
睇佢地個 look 都只係湊住幾個小朋友的母親 並唔係美食版記者
真係下下要出動大炮? 唔重架咩? 果枝鏡頭長到呢....same as 長頸鹿
佢地一行七人有大有細 一齊開飯 場面混亂得很 期間有部DC 跌左落地
yes 佢地係三枝大炮 + 兩部 DC 每有食物上枱 就影過不停 這可憐的DC
明顯地唔值錢喇 跌左落地都無人知呀