別了 09

今年真係過得太快 眨下眼就 bye bye 喇咩事都可以挽回 
只有時間 過去就過去 追唔到 留唔住

每年年尾 又係反醒的時候 今年有無白過呢? 有咩做得唔好要改善呢?
有咩要 keep 住呢? 又或是有咩要放低呢??
我覺得一個人 最大缺點就係唔識反醒 一味以為自己無問題
有呢個思想已經係錯 檢討自己係非常重要的
大家共勉之

今年要回顧的 都有D野想講下

我覺得變得最多的係心態 上左一課頗重要的 雖則過程痛苦
結果又似乎唔太好 但我相信對未來處事 有一定的幫助

有件事好想記低 :
有一日經過鞋鋪 見到有個男仔為左一對價值 $26 的白布鞋 左拼右湊
順眼一望 佢腳上的鞋已爛無可爛 殘破不堪
呢個場面好震撼到我
當刻好有衝動遞上 $20 但又怕會傷到佢自尊
好感恩的係 每當覺得自己窮的時候 都係因為想要買奢侈品
生活必需品從未缺少 感謝主 令我出生於一個富足的家庭
還有一對異常寵我的活寶貝 喺外邊踫得一面灰 有家可歸的感覺真好
就算被揶揄溫室小花也情願

今年竟然去左兩次旅行
台灣 ~ 仲懷念緊台灣人的友善
泰國 ~ 第一次全家旅行 相信亦係最後一次
同哥去旅行係唔好玩的 "無下次"的機會都頗大
去左兩個地方 證實左我最掛住的係...澳門

今年未能完成的 就係執電腦
腦內的資料真係又亂又多 尤其歌曲的 DIR
太太太太太多歌 唔知點執 又唔知由邊到開始執
結果一拖再拖
來年再執嗎? 真係唔敢再講 如無意外都係無限期押後

今年值得讚的事 :

第一位
一定係我對激光眼 800+近視眼完成手術後 只有兩個字不停飄出 : 方便
就算手術費貴一點都值得 戴眼鏡的麻煩 戴過就會知
如果有朋友考慮去做 我會勸佢盡早
呢D手術技巧已經好成熟 唔使擔心咁多
只要跟足醫生姑娘指示 手術後好好保護雙眼
問題唔大的

第二位
老爸的狀態已經穩步上揚喇 喺老媽的肥仔餐狂谷下
失去的 20磅 好快就會返唻喇 仲爭 10磅啫

第三位
年初的時候 我自行暗暗許下承諾
一年唔豪使錢 會點呢?
以往見到喜歡就買 洗錢唔抹腳的態度要改掉
賺錢買花戴的年代過去喇
要為將來打算一下
又原來... 還可以的 估唔到都唔係咩大不了
坦白說係有少少估唔到的

仲有一件事好想記低 :
一段令我猶豫不抉的感情 終於可以了斷喇
其實晨早就應該放手 都放棄過一次啦 係自己無謂的堅持
點都要戇居多次先識醒
又以為自己再努力維繫 就會有轉機
原來接受唔到的係自己 所有的堅持都係多餘

好多謝你咁樣對我 悲哀莫大於心死你潑婦罵街式的說話方式 嚇得我唔識反應
可能如你說 你唔會再忍氣吞聲 又可以令你吐口怨氣吧
但相由心生 多照一點鏡 你就知自己的表情有幾咁恐怖
最可惜 呢D方式你係覺得舒服的
又似乎 你身邊都係呢D人

最後我都係果句 : 唔緊要啦 你覺得無問題咪得囉
只係令我最傷心的 係你認為我係惡意針對你
多年的交情... 白交了 場面已經難看極了 唯有選擇離開

又原來 能夠放低執著 心情真係好好多 依家心裡的平靜 係前所未有的

回顧完畢 又係向前望的時候了