由於係早機 又要早 2hrs 到機場 check-in 結果...早上加早
都話旅行係辛苦事啦
去到機場又收到壞消息 同行的阿姨身體極度不適
原本想放棄旅程添 但心諗到我和媽兩個 人生不熟
就頂硬上了 當然滿心感謝 但另一方面又擔心佢捱唔住
我地三個一齊劃位 但入到機艙 竟然要分開坐??
喺柬埔寨的機場入境 只有五個柜位 每個仲要只有2,3人排隊
心諗 : 正喎 咁少人
E... 點解每個都過得咁慢呢? 終於都到我喇 埋到去
個關員不停講野 固然我唔會明佢講咩啦 唯有搖頭表示唔明
又嘗試講英文回應佢 可惜佢又好似唔明咁喎
跟住佢拎我本 passport 指住張相 又指住我
我估佢話唔太似樣啦 (我估啫 因為真係唔明)
大佬一本 passport 用10年 個樣有變都唔奇喎
同埋我覺得無咩問題 跟住佢有佢講 我有我搖頭...
然後有另一個關員走埋唻 兩條友陰笑
最後條友用英文問我 你係女仔 or 男仔???? 大佬呀 你隻眼無問題嘛?
我除左係短頭髮 邊忽似男人呀?
過左關之後 阿姨話D關員其實係要錢
如果你攝少少錢喺本 passport 就會暢通無阻架喇
過路費? 呢個年代仲興架咩?? 真係諗都無諗過
出到機場 原來阿姨的親戚會唻接機 而且已經等左 2hrs 唔通阿姨講錯時間?
一出機場已經有陣熱浪攻埋唻 (當時香港一直都仲係凍嘛 一時間適應唔到)
當地 30度 但對當地人唻講 已經叫秋天 佢地要著外套呀
咁藍的天氣 香港已經好少見
不過咁藍的天 (即=好曬) 呢七日應該會曬死
好多野都出乎我意料之外 比我想像中的係兩碼子的事 佢地竟然有車
仲要唔止一部 似乎係頗富豪的 只少衣食無憂果隻 雖然唔係話應該要好窮
但咁富裕... 就令我好意外囉
佢地係講 '金邊話'的 又意外地阿姨都講得一口流利金邊話 但媽就唔識囉
媽解釋當年佢係學國語的 但阿姨就係講金邊話的 結果七日裡我係聾的
最搞笑係佢地照同我講野(金邊話) 唔知係咪我一頭霧水的表情好得意呢?
定以為我聽聽下會明白呢?
呢碗粉係金邊的第一餐 哇!!! 好好味架 D粉好煙韌
D湯唔係味精湯唻架好鮮甜
當地人會放大量香草的 (我呢碗全走的)
其實當地人每一餐都會食好多香草 每次在餐廳一坐低
佢地唔係先俾水 係一大碗香草放喺你面前 而且係無限添加的
感覺上好似係食草的動物 咁咪即係牛
