新春行大運

今日陪老媽走轉新春行大運

先去'黃大仙'真心唔明點解會安排去黃大仙 
要同D國內同胞一齊逼



情形虛撼得誇張 善信再加上極多警察逼埋一齊 
所以我地選擇左遠觀後來仲實施人潮管制



我地喺外邊影下風景 hea 一陣就要上車離開喇



鏡頭一轉 我地已經坐低左食 buffet





呢間酒店嘅食物唔錯 仲竟然有部即磨咖啡機
老媽事後好安慰咁講 : 你今次總算無嘥我D錢
(因為我每次都唔太食大會安排嘅食物 去咁多次一日遊
只有兩次喺參與其中 除左今次 另一次就係食韓國燒烤)





呢間酒店D環境仲幾唔錯







鏡頭再一轉 我地又處身喺淺水灣
天氣唔錯 唔太熱 又有少少太陽

活該

之前喺茜莉妹個 blog 睇佢介紹過 "久石讓in武道館"

以前喺 youtube 搵到D片 有個人好有心機 cut好晒一首首歌 
令我都沉迷左好一陣子

但睇無幾睇 突然又因為版權問題 被人block 晒 無得睇

結果走出去大型唱片店問過 係唔會入貨嘅
(當然你可以用非法途徑 download 實有辦法架係咪先)

農曆年前某日經過信和唱片鋪 竟然見到佢返左 DVD & BlueRay 版喎  

價錢分別係 DVD ~ $450 / BlueRay ~ $650 
當刻厭貴呀... 考慮下先

點知農曆年前 家裡突然添置左 blueray 影碟機 
即刻又想起我隻"久石讓"呀

好啦....買就買啦

真係咩叫活該呀 當初 $450唔買 依家要 $540
BlueRay 仲要絕左版 oh no!! 頂呀

前排個心太煩 好少寫 blog 但有 blog友話 yahoo blog short short
終於都體驗到喇 頭先只係 upload 一張相 只係一張啫 竟然要 upload 四次
我真心覺得 yahoo 真係要搞搞佢囉 癈/咸廣告又 block 唔到
依家連相都 upload 唔到 真係好趕客架 諗下辦法好喎

憂心的農曆假

今日老爸返腫瘤科覆診

全個過程我只係不停 千祈唔好有事呀

農曆年 我家向來無咩活動

但今年的農曆年 家裡瀰漫著一片烏雲 個個都憂心忡忡

話說老爸的一邊鼻孔塞了 臨時臨急年廿九都仆出去睇專科

醫生說 : 呀 ! 真係有舊野喎 如果唔係發炎 就係腫瘤

當聽到 腫瘤  呢兩個字真係由個心震出唻

雖則大家口裡當然向好的方面講啦

但要唔擔心 根本無可能嘛

結果成個農曆年假 真係少少歡樂氣氛都無呀

真係感謝主 經過詳細檢查後 醫生宣佈 : 無事 好乾淨

今晚大家終於有覺好瞓喇

人玩我又玩之 種水晶

尋日喺facebook 見到 Lewis 玩呢個小玩兒

即刻戚起我條癮



萬事俱備



寫上心願 誠心許願
update at 18/04

終於都捨得搞呢舊野 真係有少少失望囉
效果比我想像中差 不過佢都講明 溫差係有影響嘅
依家D溫度成日相差成 10度 想好都難啦
點算好呢究竟... 掉左佢? 放埋一邊?

凍............

呢幾日無晒感覺 只有凍字..........

市區溫度得單位數 新界仲要低幾度

依家著喺身上的 :

一件樽領衫 + 一件有毛衛衣 + 一件 jacket 外套 + 一件有毛長褲 +

一對羊毛襪 + 一對充滿毛毛的鞋

最後坐坐下 唔對路 隻腳硬晒

除左對襪睇下 D腳指凍到黑晒

都係上床休息罷啦.... 蓋左

一張冷氣被 + 一張毛毯 + 一件羽絨褸

(因為知道佢淨係凍幾日 堅持唔開張羽絨被)

結果... 零暖意 瞓唔著
最後老媽見唔對路 終於郁手開張羽絨被

雨濛濛初一

落雨去拜年 真係一件麻煩事 拎到一袋二袋 又要拎遮
初一大伯家團拜日

只容許影到幾張相 大雨得要避入屋了



周地蘆薈 媽仲摘左人地兩大片 
點知走得太急 唔記得拎

26度行花市

今日請左半 day 假 去辦點年貨 再行一下花市咁囉
但26度行花市 熱到阿嫲都唔認得
一邊行一邊抺汗



日頭已經好多人的維園



呢個波波 真係搵得好辛苦呀 沿途不斷見到人拎住 
但又睇唔到邊個檔口有賣
為左搵佢 喺好熱好熱的場內 行左三轉



肥嘟嘟嘅魚 一見傾情 專登要人爬上檔口頂拎 因為淨返兩條咋



佢設計得唔錯架 仲吊住條揮春 但要由銅鑼灣帶返屯門就麻煩D
又要拆揮春 又要放氣



呢個祈願幸運板 一入場就吸引我買
好靚架 又唔貴



回家途中 影得靚天色



雲層越散越開 陽光爆晒出唻 散band



過一陣 雲又再聚埋



眼見風雲變色 日頭26度 夜晚又會突然跌至16度

" 地球很危險 速逃 "

 最奇怪架 有人好似無感覺咁 26度仲著住羽絨行維園

我差D熱溶左



出銅鑼灣 主要係想買芋蝦 前幾日電視節目介紹'八珍' 想買唻試下
點知...賣晒 (下年請早)



年尾 屋企就出現糕點陣



近D睇都幾多料咁喎

PS : 呢個 yahoo blog 上分鐘仲 upload 緊相 

下分鐘就反晒白眼

晴天

呢幾日 出門時都係天陰陰 難得今日好天氣

其實整個畫面係好靚架 但手機的角度太有限喇



醫生D藥果然有效 所有肚痛胃脹 減退 98% 
一出門又望到咁靚嘅天 good

驚濤駭浪

呢頭傷風感冒好得 72% 點知....

尋日 唔知食錯咩.....

晚飯後 已經覺得唔妥

食得太飽? 食物變壞左? 當然一切都考究唔到啦

個胃好脹.... 個肚好痛.... 個人好凍

食左粒消化丸 希望幫助一下

臨瞓前 終於肚瀉...

瞓上床 唔等於舒服晒 完全瞓唔到 結果半夜爬起身...嘔

成晚喺間屋到行來行去 又唔敢再爬上床瞓 怕走唔切 嘔喺張床到就大鑊嘛

嘔完個口陣味好難頂 潄口都搞唔掂 飲D熱水 '嗱'到條喉嚨好痛

終於...天都光埋 個人舒服左少少 
瞓左半陣 就要起身返工

實在唔想再食熱野'嗱'條喉嚨 
決定去食魚生飯....D飯

成個餐好 colorful 但我主攻佢D白飯
頭先去睇醫生確診 : 好明顯喇 腸胃炎 有過瀘性病毒

發大搞

話說上次我缸魚 講得興致勃勃咁
又出奇地佢好長命喎落喺我手上兩星期都死唔去



都幾靚架我覺得
點知有日 坐坐下 有一陣陣臭味...
原來條水草枯左 連草都俾我玩香埋
D魚都唔坊有運行啦
果然... 經過一次公司殺蟲 全軍覆沒



尋日 終於去金魚街 添返D魚仔
哥非常厭棄我上次個咖啡粉魚缸 送上一個"超大"的
雖然係微型魚缸 但放喺 office 枱面 會過份張揚嘛
但經佢多番堅持 大一點的魚缸 魚會長命一點的理論下
唯有將魚缸搬返去啦





趁佢地仲好活潑 影多兩張相先



一袋魚實在多 我又出動我的咖啡粉魚缸
下星期就係農曆年假 唔知佢地過唔過到年呢

活動一下

病左好多好多好多好多日....終於都好返少少喇
好想出去活動一下就算只係行一陣 食餐飯都好呀



呢碗湯 入口頗辣 但過一陣就無晒事架喎



有兩片香口蒜蓉多士



第一次食鴨胸意粉 真係估唔到鴨胸D質地係咁得意



食住呢份 rib 好掛住 Tony Roma 喇

太耐無影相 今次D相影得奇差 最後一張簡直係鬆郁濛代表