狂熱

咖啡狂熱 愛飲不特止 連杯都迷上



這 3oz 小杯子 係 tea time 真係忍唔住時頂癮的
為左保護脆弱的胃 一日兩杯的情況已不復再
奶茶已沒 quota 了 希望咖啡仍能繼續

大富大柚

嘩 超勁超誇....



依家唔興送曲奇餅 or 朱古力 柚子係另個選擇



眼望普通貨色



其實係一個25" 重8磅的巨柚

update on 03/02 : 媽最終喺今朝同佢'開年'
可惜....年紀實在大(肉質太老) 吃不得

討厭新年事

農曆年....公司會瀰漫住一種好沉默的氣氛
平時有傾有講的同事 新年期間 突然會低頭快閃 態度極其冷漠
以前年少無知 唔明白佢地突變的原因
後來得另一同事點醒 要派利是嘛 
我向來無去討利是架喎 明白過後 
已經極為低調 盡量少離開座位

點知...今年的情況更離譜 (真係要用離譜唻形容)
當我一離開座位 轉頭就會有文件放喺我枱面 其實唔使避人避成咁喎
為咩要咁鬼祟呢? 邊個要你封利是啫 死變態 你唔俾我唔會唱你架喎



輕鬆D啦 香港人

睇唔開

oh 點解呢...

時間 : 傍晚時份地點 : 我家隔兩個單位 (經常有不同的人出出入入的)
人物 : 年輕女子
原因 : 不明

尋日傍晚 突然有人不停狂拍鄰居的門 固然係無人應啦...
結果我開門探頭張望 (其實我地等緊 pizza 一心以為送貨的拍錯門呢)
點知一開門 有三個警察走埋唻

警察 (望我一眼) 第一句 :  屋企有無大人呀
我 : (心諗) 我已經三十幾歲喇 大人左好耐喇
警察 (再望入屋 見到爸媽喺到) 自言自語 : 哦...有大人
我 : (心諗) 企喺你面前果個都係大人呀
警察 : 你地識唔識隔離的住客呀?
我 : 唔識喎 佢地喺半夜至活動
(因為每次都一大班人返唻 而且極嘈 每次都嘈醒我)
警察 : 吓... 唔識呀 佢地有咩人出入架?
我 : 後生仔囉...
警察 : 咁呀...你可唔可以俾我抄低你的身份證資料呀
媽即衝出 : 做咩要抄低我地身份證呀?
警察 : 哦... 都係一個記錄啫

對話就此結束 但事件並沒有就咁完結... 一堆警察守住鄰家門口我呢 
(因為食飽左 無野做 電視又唔吸引) 所以一直喺氣窗留意住佢地一切活動
但佢地都係無奈的等....等....等....等
期間我地一屋五人 不停估佢地會犯左咩事呢? 要出動一大班警察上門搵人 賣丸仔?
車到人不顧而去? 傷人? 而且班警察似乎無打算離開 應該係大單野喎
結果我哥離開大廈的時候 就知道事端了 : 有人墮樓呀
再過 90mins 該單位人士 終於出現... 

哥食飽無事做 撩交嗌 (初三嘛) 你個樣都五六十歲啦 仲俾人當細路 咁搞笑

蠔.....子

初二.... 開年 固然有開年"飯" 沒碰飯三日 肚子只靠乾糧/雜食充塞
尋晚腸胃作出大控訴 今朝放入通粉安慰一下

蠔 只會一年食一次 人家說 流浮山的蠔 已受感染 不宜進食 但一年一次
應該沒問題吧
洗的過程唔複雜 但花時間....



倒出唻 好污糟呀



先落D生粉 + 鹽 '嗱佢一嗱'



佢地自行'嘔'D污糟野出唻



嗱過之後 眼見雪白 但其實仲係污糟的



跟住要逐隻慢慢刷



刷左第一次 真的變雪白喇 

但仲要再刷多次 乾淨D好



乾淨晒至於煮呢 實在無能為力



登...登...登 食得

味道很好 但很膩的 輕嚐就可以了

新春一日遊

我家親戚 全部都住喺空氣清新的村屋 但天氣冷 真係有少少難頂
今趟仲唔係冷得我騰騰震
家的範圍很大 但 80% 都係露天的 厚厚的羽絨不離身



空地很多 所以種左好多菜 此乃 " 油麥菜" + "菜心"
要食麼? 就順手一摘 洗一洗 煮一煮 就可以喇 "新鮮"兩個字就出現了



好肥厚的蘆薈 隨處可見



勁大盆的水仙 有待開花



開得好燦爛的花 留個倩影先



仲有路邊小野花
凍了一天 回家後 頭暈兼作嘔 唔認老都唔得

大吉大利

大年初一
我不喜歡過年 從不為這節日雀躍 而且沒怎氣氛似的 要買新衫新鞋
亦唔會等到呢個時刻 走去同人逼 何況我家親戚唔多 又向來沒來往
每年見面一次 就是過年了
老實講 一年見一次 何來話題呀 所以飯局都悶得很



為沉悶的節日 添一丁點兒的'朝'氣

奇華蛋卷

想食蛋卷的衝動 大約 5年一個 round 適逢過年時節
喺蛋卷同曲奇餅之間 兩者選一



好靚的 packing (雖然都只係包左張紙啫)



好有過年氣氛



糕點沒興趣 飯又沒得吃 就靠佢唻 "救命"

夕陽無限好

暖左幾日 突然又轉凍
原已收妥的厚褸 衛衣 全部又再出動



喺手機發現幾張相 心頭一暖



仲有一隻 "龜"

收爐喇

收爐喇 一定要將舊年的'衰'氣掃走
今日請左半日假 去辦一下年貨 順道去維園行一轉
為避免夜晚的人潮 都是揀下午時段穩陣D



牛年風車 又平又靚



賀年食品 90% 都沒興趣 就只有芋蝦
(死 望到都已經有少少喉嚨痛)
每年粗/幼各買一包 舊年腸胃未過年已壞了 沒得吃 今年可以盡興了吧

年尾流流 仲要整單'杰'野 點解明知要駕車 都要飲咁多酒
你不負責的行為 累了六個家庭呀 人家不能團圓了 你良心過意得去嗎?
你還瞓得著嗎?
不過喺晚飯時間 播出這'哭哭啼啼'場面 我的飯 吃不下去了
家屬們 請節哀 多多保重

身體健康

農曆年將近... 搵返一張環保揮春
(仲搵得返 算是奇蹟)



好一個"身體健康"

舊年年尾 身體差得很 令同事都看不過眼 突然送上此揮春
雖然保我不住 (初三被老媽捉入急症室) 
今年老爸更需要此揮春

掛揮春的位置 原是掛鐘的
點知被那 "茂利風水師" 說是邪位 不能掛鐘
結果...好地地的一個鐘就咁俾人掉左

割愛

有D野 就算佢本身係幾好 無問題 但唔啱你就係唔啱你 強求亦無謂



就如呢副木框眼鏡 絕對係心頭好 但實在太重太重
成副野有 40.2g 人都癲 但我真係唔想放棄架...
可惜戴無幾個鐘 連頭也劇痛起來 無奈地要放棄



呢副係新眼鏡 揀框時 
只有兩個要求 : 全黑色 & 輕身由於有其他條件限制 
所以揀框都困難重重



同場加演 終於都有啱我度數的 soft lens 喇
原來 soft lens 的面積比 hard lens 大好多
(呢對係俾我試戴的sample)



hard lens 只係少少一塊反而唔習慣 soft lens 蓋實大部份眼球
不過有個好處 去旅行唔使帶藥水 用完即棄

大迷信

呢篇一定係"人都癲"系列之最嬲 爆嬲

親戚甲 (平時極少聯絡 一年見一次果D呢) 得知老爸有病後

經常致電 游說老爸多去佛堂
(只是佢地口中的佛堂 不過佢地又唔係正宗的佛教
但究竟係咩門派呢 我真係唔識)

老爸媽無任何宗教信仰的.... 但親戚甲確實沉迷
誇張得講到信教後會無病無痛添 講得咁神化 咁所有醫生咪失業
我呢 唔阻人迷信 但唔好太危言聳聽囉 而且他們的說話實太神怪
更令我反感

話說 親戚甲說佛堂中有個是中醫師 可以幫老爸 "把下脈"
okok 藥方都係幫助清下熱毒吧 
這中醫師一約再約 忙得很呀 最後說親自上門見面 咁客氣呀
初初說大家是佛堂中人只是幫下手 小意思吧 (意思指免費的)
但臨上門前一刻 又說要比封"利是仔" 
不過大家素未謀面 太"友善"又唔需要

今日下午 係那名所謂中醫師上門的日子 我真係唔想同佢地見面
所以出外避開一下 點知返唻得到的訊息 真係火都唻
該名中醫師 先未得戶住(=我爸) 同意 無拉拉幫我地間屋睇風水
點解唔問一聲架 我地無要求亦無需要睇風水喎
一入門第一句就話 : 你間屋有好多邪氣 有20多隻邪靈
嚇得極怕呢家野的老媽身也震
跟住果D仲精彩 佢要求家中的木 sofa 換上兩座位 sofa
(但間屋明明有三個人住喎 咁另一個人坐地下)
他說柜內有眼有鼻的公仔擺設 極招邪靈 盡快收起
連老爸都問我一句 無眼無鼻的公仔 有人買的嗎

很恐怖嗎? 但我覺得好英喎

小熊維尼都有眼有鼻架

連呢幅 2,004 塊的砌圖 都說邪 要密封 唔係嘛
難道掛得滿屋神像圖 就能保平安??
他又話我家的地磚 & 牆壁顏色不對
大佬呀 一屋傢俬 唔係話變就變架喎 佢的解決辦法都極其古怪 

買D野返唻鋪鋪貼貼 搞到間屋咁 都唔會舒服得去邊啦
ok 所有野都唔重要 最最最最離譜 
佢竟然拋下一句 : 要講的講晒 信唔信就係你地決定 
不過你地再唔作出修改一年後就會輪到老媽出事
大佬呀 家中的病人剛初癒 唔好講埋晒呢D野好喎
你拋低一堆說話搞得人家極為不安 又何必啫

而且信佛的 唔係導人向善架咩? 會講呢D說話咩?!
你個仔就醒目呀 晨早搬走左 留低你地三個喺到受罪
我就唔信若然我地任何一個有事 我哥會覺得自己搬得早避一劫

如果一間屋咁大問題 住左接近 30年 要死都應該死晒啦 
好很嬲呀親戚甲呀 親戚甲 請你別來搞事吧

update : 極度 "怕鬼" 的老媽 真的要求哥將柜的透明玻璃 用紙密封

十級嬲 + 20級唔開心呀 好地地的一間屋搞到咁

親戚甲 我真係想爆你呀 好嬲呀

好嬲呀 好嬲呀 好嬲呀 好想殺人呀

哈

星期四 心情好
戰鬥三日 終於完成令人一頭煙的工作
好好慶祝一下 食粒朱古力先



心情難得的好
天氣很冷 公司冷氣更冷 但空氣唔流通 結果鼻敏感大爆發
只係半朝早 已抺了半卷 tissue 垃圾筒如米缸般 : 常滿



心情好 鼻子抺得痛痛的 都沒問題

過客

人生中 總會遇上好多過客



聚聚散散 留低的會是什麼?

幾年前突然話要離開出外走轉 甚至開到口 叫人唔好搵你
你返來的話會自動出現
會唔會太神怪呀?? 理由都唔講得? 咁神秘?

又好衰唔衰 俾人喺香港見到你 有咩要講大話呢?
坦白說 我對別人的事毫無興趣 你唔需要專登作個大話出唻
所有大話都會有被揭穿的一日

到今時今日 你就若無其事出現
oh... sorry 呀 我唔知用咩態度面對你喎

Lost

明珠台近排播出新 season 但越睇越迷.....
尋晚睇睇下 突然好想放棄(好彩最後都發揮左頑強的忍耐力睇晒)
今趟真係 i am lost in " lost "



當初 season 1-2 真係好吸引 呢套DVD 絕對唔少得
但依家有少少後悔
所以暫時只買左 season 1
因為有好強烈的預感 佢會爛尾

變種細菌

呢兩年都有打'流感針' 舊年打左之後 真係少左好多感冒喎
以往一年都有好幾次的大感冒 都自動失蹤 (最好以後都唔好返唻添)

但今年 情況好奇怪.... 公司同舊年一樣 亦提供服務 
邀請醫生到公司 幫所有同事打針
隔無幾耐...公司大部份同事 一齊感冒 
向來身子唔太強的我 固然都被傳染啦

最最最奇怪的是.... 你感覺到身體係作病作病咁 但唔知咩理由 
一直發唔到出唻喎 尋日朝早醒左 就發覺條喉嚨劇烈的痛 
連吞口水都好有困難 向來喉嚨都係弱點 喉嚨痛後
感冒隨即就會跟住唻 我梗係唔敢怠慢 即刻飲杯蜜糖水潤一潤先 
(但實質作用都無咩) 仲諗住今次死硬 喉嚨痛得咁厲害....
但今朝醒來 又竟然自動好番 90%
咁其實係細菌變晒種? 定係枝流感針發揮作用呢? 有無人可以話我知



送上小花一朵 : 精神D呀....

白色恐怖

近排公司 多左好多顏色鮮艷的花 好....等我又幫佢地留倩影先



喺一個白白灰灰的 office 出現咁鮮色的花 突然感覺好似去左探病咁



尋日突然收到 memo 宣佈 cancel 今年個 annual party
隨即今日就出現一D傳言 公司會裁員
假的假的 所有呢D消息都係假的

update : 消息係真的 集團另一組公司已進行大逃殺了

唇瘡

前幾日開始 都覺得唇邊有少少怪怪地喇 頂呀.... 又生唇瘡

唇瘡是由疱疹一型病毒引起的感染，通常出現在嘴唇和鼻孔邊緣，
唇瘡的分泌物含有疱疹一型病毒，具有傳染性。 
(放心吧 我已經分開左毛巾)

徵狀 : 當唇瘡開始出現時，患者會感到患處痕癢和灼熱，
然後會發現患處出現一撮小水泡。
當水泡破裂後，便變為形狀不一的潰瘍。
(我條唇 依家好硬)

為甚麼會長唇瘡？
曾經受過疱疹一型病毒感染者，病毒會潛伏在身體內。當身體的抵抗力下降時，
這些病毒便會再次活躍起來造成感染。導致抵抗力下降的因素包括：

1)  精神壓力 (中喎)
2) 疲勞過度 (又中....)
3) 感冒或其他疾病 (未清啫....)
4) 月經週期 (dee..又中)
5) 晒太陽 (搞錯呀 尋日晒左一陣咋喎...)

處理方法 :
唇瘡一般會在兩星期內自動痊癒，為免引致痛楚或把病毒傳染他人，
可參考以下方法：

1) 患者應盡量保持患處清潔及乾爽，以免細菌感染
(依家呢D濕度 乾到甩晒皮啦 仲想點乾呀)

2) 避免進食辛辣及硬的食物，以免刺激患處
(頭先食左法包 唔怪得咁痛啦)

3) 避免用手碰觸患處, 如踫觸後應立即洗手, 以免身體其他部份, 例如眼睛,
性器官等受到病毒感染而引玫角膜炎或其他皮膚病
(ok ok)

4) 避免親密接觸，例如接吻 (嘻)

5) 可徵詢醫生或牙科醫生的意見，使用藥膏塗在患處以舒緩不適 
(搽左....)

6) 如果病徵嚴重，醫生會建議服用藥物以減低痛楚
(點先叫嚴重先???...)

活下來.....

隻眼....20 級腫...10 級痛 全因尋晚
情緒 2,000級低落

幼孩的時候 喊差不多隔日發生 但唔記得邊年開始 
好討厭自己成日喊喊喊
後來直情將呢個 "習慣" 完全戒掉 而且更憎人成日哭哭啼啼 
喊又解決唔到問題

不過 原來喺好無助的時候 喊 係一個自然反應

呢幾個月一直控制得好好的情緒 
終於喺尋晚爆發了 流出的眼淚 應該近呢十多年的總和
要照顧一個病人 真係無從入手 除左一D無用的鼓勵說話 
究竟仲可以做咩?
眼見一個至親 不斷受折磨 心...真的在滴血



請所有的副作用 盡快消散

Happy New Year

Happy New Year

將所有衰氣掃出門口

一直以為新曆新年 係無煙花放 原來都有 5 mins 的規模 
喺大廈頂噴出煙火 好似有少少....似火燭的感覺 
咁啱得咁橋 樓下傳來火燭車聲

一向都有節日恐懼症 又怕人多又怕嘈 極少極少出席各型式的 party
都係靜靜地過的來得舒服





新一年 大家都要身體健康呀