17 年

喺同一間公司 工作 17年 當年17歲 歲月真係摧人老



不過 係真心開心的 喺工作環境認識到一班好友 這種幸福 夫復何求

一堆友當中 佔大部份都是舊同事
 這是我意想不到的在此大聲說 : 愛死你地呀

友人們 別只羡慕我的工作是高薪糧好 有時候都會高"辛"架
只係我喺工作上好少睇唔過眼

是日 : 中秋

~   中秋節快樂   ~





月餅 從未列入喜歡的食品 但每年都想食...少少
固然唔會主動去買 所以有好多年都無食過
今年哥的公司派到每人幾隻 (當然佢都係唔食的)
又固然佢將'棄嬰'帶回家

當時心諗 : 正喎 終於可以食到
剛剛晚飯的時候 興高采烈地切了 1/4 去叮得微暖

食左第一啖 哇!!!!!!
好甜好甜好甜 太甜喇.....一定要整咁甜架咩?
絕對絕對 唔係健康食品
好勉強地食晒這 1/4後 然後同老媽講
如果之後我無再踫餘下的 3/4
不用提我喇 直接'歸西'



由於實在無辦法食月餅慶節 拿拿臨買左個美x蛋糕 (迷你版)
呢間美x 果然識諗橋 依家D蛋糕出埋迷你版
啱晒我地呢D單身寡婆 無理由買左 standard size 返唻勁隊架
依家有呢D迷你版 超正! 雖則老媽話超唔抵

半日閒

2010年 打個乞嚏已經過左 3/4

回想一下 好似好耐無放過假咁 之前放假都係要去醫院奔走
好... 今日就放半day



行左半個下午 已經有D攰 仲超餓
要扮下闊太(廉價版) 食個廉價TEA
呀... 其實呢份係腸蛋治 超好味



友人選擇西多士 竟然無花生醬夾喺中心
雖則我係花生醬王 但西多再加花生醬真係超膩



呢款俾徐小姐著到出晒名的健康鞋 喺好耐好耐以前
行過馬拉松已經有售 當時都心郁郁想試下 但實在太貴 差不多二千
點知俾徐小姐著佢一著 想買到都難 近排友人突然提起想買
所以大家一齊放個假走一轉 踫踫運氣
好彩大家都有碼

麻煩友

前陣子 一邊耳仔'卜卜'聲 有時頻密D 有時又無事
不過依家已經無晒卜卜聲喇

今日突然耳仔裡面 有點怪怪的
痛又唔係好痛 痺又唔係好痺 
唔知想點咁
慢慢半邊面都好似痺痺痛痛咁

似乎要睇下大夫喇 經醫生檢查後 
佢話有兩條頭髮插住左耳膜 導致發炎
幾跟努力下 醫生夾到一條出唻 另一條插得太深喇





醫生話 先食藥+滴藥水消炎先 
如果再痛 要去醫院夾返條頭髮出唻

老媽聽完我的陳述以後 
吐出一句 : 你果然係一個麻煩友
喂! 我都唔想喎

其實點滴耳仔架? 瞓喺到滴? 
滴完要幾耐先起得身架?
起返身D藥水咪流返晒出唻囉? 
咁咪=無滴過囉?

陽光普照

尋晚食食下飯 突然話有雷暴警告
當時仲唔覺得有咩唔妥 但因為有友人住得頗遠
所以大家快快食完 埋單走人

然後就精彩囉...唔知可唔可以用 "癲左" 去形容個天
但實際個天真係癲左 無間斷地閃電 + non stop 地響雷
入睡前仲擔心明早點返工 落大雨 好麻煩架嘛



但一早醒來 個天好似咩都無發生過咁 仲陽光普照

友人說 尋晚完全無瞓過 太嘈喇
向來失眠王的我 尋晚咁惡劣的天氣 都能極速入睡
只要你當天早上 5:30 起來拖地 做家務 然後返工然後再打一場波 
包你就算個天冧落唻 都可以隨時呼呼入睡

當然我唔係癲左 晨咁早起身做家務咁勤力啦
全因為老媽前一日 煮煮下餸 突然中左暑
第二日喺極頭暈下 仲要堅持晨早完成所有家務
身為全家最年輕的我 唯有起身同佢搶過啦
如果呢D情況下 我仲繼續瞓 唔起身幫手 

恐怕過唔到尋晚 (被雷劈死)

肚滿腸肥

今日又係打羽毛球的日子
由於上次食飯 一張倩影都無留到 所以今次 encore
次次打完波都狂食 你話癲喪唔癲喪呢



嘩 呢張相就咁望 碟菜"好似"好靚咁
但實則有點難食 用蒜蓉炒 但無蒜蓉味



好失色呀 呢碟咸蛋黃三寶
上次好夠乾身好脆架嘛 人地仲冒住膽固醇超標 堅持要叫架



呢碟沙律骨 ok 普通啦 但碎骨很多



全晚之冠 冧酒蠔
最後追加的金針雲耳牛肉 sorry 呀 
傾得太忘型 無幫你留倩影呀
飽得很誇張 有排唔使瞓
其實我係咪增緊肥呀? 咁食法...

孔雀男與榴槤女

要睇呢套劇 真係一波三折
喺預訂飛期間 已經出現問題 向來都選擇郵寄訂飛 
點知...今次寄失左
結果原本想訂果場已經 full 晒 要改另一場
(後來佢地又話搵返晒D信 唔使 cancel 張票
cancel 張票銀行要收 $100 charge嘛)

order form 最後都會有句 : 如果喺幾多幾多號前未收到 confirm 電話
就要打電話查詢喇 但這電話真係實在唔想打

因為曾經有過唔太愉快的經歷呀...唔記得邊次遲遲未收到門票
逼不得已要打去問下啦 點知聽電話人仕非常晦氣地說 : 我都係啱啱收到咋
豬頭炳 : 唉...我點知啫 明明係你地寫幾時幾時未收到 就要打電話嘛
又唔係我專登想吹你



呢套劇有別於過往的劇種 大部份劇情
係用有點誇張的的方式諷刺香港高官的行為 但由於自己對政治零興趣
所以整劇來得很悶 & 很多唔明呀 (期間我甚至有考慮過 好唔好早走)

另外又講一班人因為H1N1被果喺酒店 感覺也有很 out 了
雖然只係舊年9月的事 但可惜香港人很善忘呀
(好多人認為封酒店係有點誇張 但經過沙士一疫
這做法無疑令病菌無喺社區擴大開去呀)

對白中加插左好多粗口 但來得唔自然呀 好有'為講以講'的感覺
不過都有地方值得讚 舞台個景運用得好好呀 服飾也不錯
當中有一個演員 : 韋羅莎 做得好好呀 條腿又靚
另一個係 : 劉守正 演得也不錯

我最喜歡的一場 係凌教授 (梁祖飾演)病危後 憶起當年認識太太的經過
當年如何祈盼 rose (君飾演) 能成為自己女友 到後來變成老婆
再到多年以後 大學教授變成到處留情的負心漢 
rose亦變成滿身尖刺的榴槤女
愛情一耐左就會褪色 變得唔再珍惜
(如果呢一 part 再放大一點 悶場就可以減少一點嘛)
套劇咁強的演出陣容 真係有點浪費啊

坐我隔離的男仕 成晚如坐針氈 每隔2秒就轉一下坐姿 

郁來郁去 + 不停放蚊 非常影響到人地睇劇
我一直打算中場休息時同佢講下 點知呢套劇係無中場休息

**************************************************************

有條低B妹 唔知點睇野呀 竟然記錯今次演出場地
唔知點解一直以為係尖沙咀文化中心由於依家好少出去閒逛 
趁難得出去 安排左幾件事 要係今晚完成

喺公司出發前 我個腦已經安排好晒路線 諗住萬無一失
60%的事 都喺預計時間內完成 左騰右騰後 終於坐低填肚
向來好穩陣的低B妹 喺等野食期間 又check下有無帶飛 順手又望下

點解寫 Hong kong city hall?? city hall...喺邊架?
幸好飯後要再搵一友人 順便問下佢
city hall 喺中環架喎 中環... 去 shopping 就識路啫
city hall 無得 shopping = 從未去過

幸好低B妹從不遲到 所以預好多時間俾自己(去擺烏龍)
出左中環地鐵站 超大雨啦 (貴人嘛 出門總招風雨)
死喇 city hall 喺邊呢?? 低B妹變身鄉下妹
初初我憑自己的直覺'亂行' 可惜太大雨喇
ok...搵人問下先 一個年青哥哥仔迎面行來 佢都唔識路

最超搞笑係兩條唔識路的人 一齊憑直覺估下究竟係邊到呢? 
佢都認同我的'猜測' 突然又見到另一路人乙(全條街得我地三個人) 
我即刻拋棄年青哥哥仔 衝去問這叔叔 佢很胡亂一指 : 後面咪係囉
唔該晒 麻煩晒 (對方無禮貌的時候 我要更有禮貌啊)
後面? 由於我又信佢啦...好...就行去睇下....但究竟點過馬路呢?
因為仲有時間 我打算行一條比較熟識的路 = 兜一大個圈
但我又唔想經過張國榮墮樓的地點 唔通要再兜遠D?
當我個腦仲出緊路線圖果刻 隻眼竟然望到有個窿指住 : 大會堂

yes !! 然後又憑住人行我又行的道理 死跟啦
oh...有橦大廈寫住自己係 city hall 由於仲有時間
望住對面的立法局 + HSBC 好靚呀 留下倩影先
影影下 又覺得唔太對路 好啦 早少少入橦大廈
條鄉下妹又跟人等 lift 上左 8/F 
喺高處望出中環碼頭超靚但點解一個人都無呢 
不過果到應該都有演出架 因為有工作人員

eee...佢寫住演奏廳 但張飛寫住 : 劇院喎 又錯
由於無時間再俾我 hea 喇 要搵個正經的 security 問下
終於去到場館 但點解咁多伯伯叔叔 又唔見今次個劇張 poster?
原來有好多個場館架 當伯伯叔叔散咁D 就望到張超細的 poster 喇

好彩唔係去到文化中心先發現錯晒 否則我應該會瘋掉

懷勉過去

今日發生的事 有點匪夷所思 著實係有點'驚'訝

近日得知一位友人有左BB 有鑑於我係禮貌小寶寶 (雖然無人認同)
這句 : 恭喜的sms 少不得啦

今日 lunch 要食餐所謂政治飯 雖則一年都係得幾次 
但可以避免的話 都想缺席囉前一晚 我與家父母親討論著 
明天不如都請假啦 (上次飯局已臨時甩底)
但老媽好言相勸 : 避得一時 都避唔到一世呀 可以避幾多次呢?
而且唔該你同你的同事聯誼一下 別太獨來獨往
(佢真係咁講 但獨來獨往係我的特性呀)

今日的餐桌期間 氣氛比往常的好... 呢點係我意想不到的 
可能係心態上放鬆了 既然避唔到 何不快快樂樂咁食左佢 
無謂同自己過唔去嘛 (壞情緒對身體無益)
我又將今日的感覺 用sms同一位同枱食飯的同事分享了
呢D sms 向來甚少發 但今日就做了 原因不明 
目的也不明 發過以後 心情相當良好

***************************************************************

天父爸爸 見我終於肯踏出第一步 竟然再推我一把呀

晚飯後 與家中倆佬發癲式地胡說八道期間 突然電話響起
老媽異常驚訝地說 : 搵你架 但佢爆你中文全名 邊個唻架?

豬頭炳 : 喂...你係邊個? 對方說出自己名字...

17年完全無聯絡的中學同學

佢地有幾個同學原來在 gathering 席間竟然有人帶左
當年大家胡亂寫的紀念冊 (寫紀念冊這玩意 當年極其流行 
寫寫自己的資料 對對方的感覺 等等等等
目的係想大家keep一點聯絡? 
但其實當中真係有幾多人會閒時拎出來睇下呢?
呢個一定唔包括我 畢業17年 從未有一刻衝動想拎出來望下)

他們說 : 畢業後沒有人有你消息呀? 你什麼樣?

首先我唔知道原來有人有興趣知道我的消息其次...
我又唔太認為大家想keep住同我聯絡呀
(求學期間 我家電話也不太會響呀 點會突然覺得你地會想起我呢)

向來只做自己喜歡的事 對沒興趣的事 原則上 : 不講不聽不聞不理
所以對學校發生的一切事 知得極少
當年已經如是 至今亦都如是 : 邊個結左婚 
邊個生左仔等等 (其實都好正常)
又沒太有興趣知道呢

但最令我覺得有問題的 係大家閒談到第15句後 

果種沒話題的 dead air 實在有點尷尬
自己唔係經常懷勉過去的人 努力向前走已經好費氣力呀 

仲要不停回頭望嗎?

所以17年無見 究竟有咩話題呢? 難道就係一直說著從前?
不過 知道大家都別來無恙 總算不錯吧

先旨聲明
由於個人並不會 post 自己的相上網
亦唔願意'亮相'於各人的網上/facebook
(包括任何階段的相片 請大家都幫幫忙 將我變成格仔人 謝!! )

肥野

今日午餐 突然想出去行下 就順便食個 lunch



太興出品 : 什麼(忘了)牛柳瑞士汁炒河人家說牛河 
條條都是油 都說 好味的就唔健康
近排個胃已經俾我虐待得七勞八傷
又要戒一下奶茶咖啡 唯有揀例湯



例湯有月光呀



影多幾影 連外星人都出動喇

呢個世界 真係咩人都有 lunch 期間 坐我隔離張枱的一對騎呢母子
兩條友食一碟炒牛河 食左 9/10 後 突然投訴碟牛河一舊牛肉都無喎
除非佢地喺食果陣係鬼上身 or 靈魂出竅啦 

結果...人家梗係換過碟俾佢
呀...佢地將新送上枱的牛河隨意食左少少

然後打包囉咩呀
友人說 : 他們家肯定有人未食 lunch
奸招